Специјализирани воени авиони на НАТО извршуваат патролни летови над Бугарија, следејќи ги активностите во воздушниот простор и на море, објави бугарската телевизија бТВ.
Станува збор за авиони од системот AWACS, наменети за рано предупредување, воздушно набљудување и контрола, кои обезбедуваат поддршка за мисиите на бугарските борбени авиони.
Информацијата за активностите ја потврди и самата Алијанса преку официјална објава на социјалните мрежи, придружена со фотографии од авионите.
Според НАТО, ваквите заеднички операции овозможуваат навремено откривање и следење потенцијални закани, како и побрза координација меѓу сојузничките сили.
Авионите AWACS располагаат со специјализирани радарски системи што овозможуваат следење на воздушни активности на големи растојанија и обезбедуваат информации неопходни за заштита на сојузничкиот воздушен простор.
Од Алијансата нагласуваат дека соработката со бугарските воздухопловни сили е дел од активностите за одржување на безбедноста и подготвеноста за реакција.
Во официјалното соопштение не е наведен конкретен инцидент или непосредна закана што би била причина за овие летови.
