Седумнаесетгодишно девојче од Тангер успеало да доплива до шпанската енклава Сеута, но во трагичниот обид за преминување на границата го загубило својот осумгодишен брат, додека неговата мајка сè уште се води како исчезната.
Според нејзиното сведоштво, семејството било дел од голема група мигранти која минатиот четврток се обидела по морски пат да стигне до шпанска територија во потрага по подобар живот.
Девојката раскажала дека видела како шпанските спасувачки служби го извлекуваат телото на нејзиниот помлад брат од морето. Таа успеала да стигне до брегот, но од тогаш нема никакви информации за својата мајка.
Во изминатите четири дена, како што вели, преживувала благодарение на помошта од локални жители, кои ѝ дале храна, облека и можност да се искапе. Кога побарала сместување во државен центар за малолетници, ѝ било кажано дека нема слободни места.
„Видов луѓе како газат по мртви тела. Сега сме деца што просат по улиците“, изјавила девојката.
Според локалните власти, во Сеута моментално престојуваат околу 860 малолетници без придружба. Тие се дел од неколкуте илјади мигранти кои останале во градот по масовниот бран на преминувања.
Шпанските власти соопштија дека најмалку 72 лица загинале при обидот за преминување на границата, претежно во морето. Мароко, пак, пријавил уште 11 загинати кои не се вклучени во шпанската статистика.
Центарите за прифат на мигранти се преполни, а хуманитарните организации предупредуваат дека многумина спијат на плажи и отворени простори, без доволно храна и основни услови за живот. Активистите обвинуваат дека условите се толку тешки што дел од мигрантите се принудени доброволно да се вратат назад.
