Украина помина низ уште една драматична ноќ откако Русија изврши нов бран жестоки напади врз повеќе региони, оставајќи зад себе урнати згради, повредени цивили и сцени на хаос и паника.
Според украинските власти, најмалку 11 лица се повредени во нападите, а снимките што се појавија од теренот покажуваат спасувачки екипи како извлекуваат луѓе од урнатини додека сирени и експлозии одекнувале во текот на ноќта.
Најтешко погоден бил градот Конотоп во Сумиската област, каде што проектил или дрон погодил станбена зграда. Според локалните власти, во нападот биле уништени неколку ката од објектот, а голем дел од жителите останале заробени под рушевините.
Гувернерот на регионот, Олех Хрихоров, соопштил дека најмалку шест лица се повредени, додека градоначалникот Артем Семенихин изјавил дека станува збор за масовен напад кој предизвикал сериозни оштетувања.
Спасувачките тимови во текот на целата ноќ ги пребарувале урнатините во потрага по преживеани, а потрагата продолжила и во утринските часови.
Ситуацијата дополнително се влошила поради недостаток на амбулантни возила, па дел од повредените биле транспортирани во болници со приватни автомобили.
Покрај станбените објекти, оштетени биле и административни згради, куќи и станови, а според локалните информации, целосно бил уништен и градски музеј.
Проблеми биле регистрирани и во регионалниот центар Суми, каде по нападите дошло до прекини во снабдувањето со електрична енергија.
Нападите продолжиле и во други делови на Украина.
Во Днепар биле погодени неколку складишта за храна, при што биле повредени пет лица. Според регионалните власти, меѓу повредените има маж и жена кои завршиле во болница.
На удар била и Одеса, каде што биле оштетени станбени згради и автомобили, а една еднокатна куќа била целосно уништена. Засега нема официјални информации за евентуални жртви во овој напад.
Во последните месеци Русија речиси секојдневно изведува ноќни напади врз украинските градови, при што честа цел се енергетската инфраструктура, транспортните системи и цивилните објекти, особено во областите поблиску до фронтот.
