Украински поморски дрон потопил руско беспилотно пловило во Црното Море, во инцидент за кој Киев тврди дека претставува прва поморска битка во историјата меѓу две беспилотни пловила.
Украинската воена морнарица соопшти дека при извидување било забележано руско беспилотно пловило во Црното Море. Според нивните наводи, потоа било испратено украинско поморско беспилотно пловило, кое се приближило до руската цел и отворило оган со митралез.
По пукањето, руското беспилотно пловило било потопено, тврди украинската морнарица.
„Ова е прва поморска битка во историјата меѓу беспилотни пловила“, навела украинската воена морнарица во објава на Телеграм.
Украинската страна објавила и видеоснимка на која, според нејзините наводи, се гледа пукањето и уништувањето на малото пловило. Неговата идентификација, сепак, не е можно независно да се потврди.
И Украина и Русија во изминатите месеци интензивно развиваат беспилотни пловила за различни воени намени. Меѓу нив има и пловила натоварени со експлозив, наменети за напади врз бродови, но и поморски дронови опремени со митралези и ракетно вооружување.
Украина, исто така, тврди дека користи поморски беспилотни пловила способни да пренесуваат дронови со краток дострел во близина на руското крајбрежје.
