Тензична ситуација се случила во украинскиот град Лавов, каде што дошло до пресметка меѓу цивили и припадници на територијалниот центар за регрутација (ТРЦ) за време на акција поврзана со мобилизација. Во инцидентот била оштетена службена опрема, а возило на регрутните служби било превртено од страна на насобрана група граѓани.
Според информациите објавени од украинските медиуми, конфликтот започнал за време на патрола за проверка на лица кои подлежат на воена обврска. Портпаролката на полицијата во Лавовската област, Алина Подрејко, изјавила дека службениците идентификувале маж роден во 1996 година, кој наводно бил баран поради избегнување на воен рок.
Од Лавовскиот регионален територијален центар за регрутација соопштиле дека лицето било запрено околу 21:30 часот на улицата „Червона Калина“ за проверка на идентитетот. Откако било утврдено дека се наоѓа на листата на лица кои треба да бидат проверени, мажот бил придружуван до центарот за да помине воен медицински преглед.
Во меѓувреме, друг тим на ТРЦ кој останал на местото бил опколен од група граѓани. Според официјалното соопштение, луѓето се однесувале агресивно, го блокирале службеното возило, го оштетиле, а потоа го превртеле.
„Групата го опкружила возилото на припадниците, се однесувала агресивно, значително го оштетила и на крајот го превртела“, навеле од ТРЦ.
Гувернерот на Лавовската област, Максим Козицки, изјавил дека по настанот бил одржан состанок со претставници на безбедносните институции. Тој нагласил дека сите лица кои учествувале во прекршувањето на законот, вклучително и оние кои ја попречувале работата на воениот персонал, треба да бидат идентификувани и да одговараат.
Сепак, паралелно со истрагата за однесувањето на цивилите, ќе се проверува и постапувањето на припадниците на ТРЦ. Од регионалниот центар најавиле внатрешна истрага со цел да се утврди дали постапките на службениците при приведувањето и известувањето на мажот биле законски.
Очевидци за локалните медиуми тврдат дека ситуацијата започнала откако мажот бил физички нападнат и внесен во возило, по што успеал да избега. Ова предизвикало револт кај присутните граѓани, кои потоа го блокирале патот и побарале објаснување за случувањата.
Случајот предизвика големо внимание во јавноста и повторно ги отвори дебатите во Украина за начинот на спроведување на мобилизациските мерки, контролите на терен и односот меѓу службите и граѓаните.
