Советот за безбедност на ООН синоќа ја усвои резолуцијата 2803 – документ кој веќе се нарекува најнеобичната и најконтроверзната резолуција во историјата на организацијата. Причината?
Резолуцијата му дава зелено светло на предлог-планот на Доналд Трамп за Газа и создава специјален Одбор за мир, на чиј врв – според самиот Трамп – ќе стои токму тој.
Според делови од документот, во кои имал увид CNN, Одборот ќе делува како преодна власт во Газа во наредните две години, а под себе ќе има мултинационални мировни трупи, палестински технократи и локални полициски сили.
Она што дополнително буди внимание е фактот дека Одборот не е директно подреден на ООН, ниту е обврзан од претходни резолуции – што го прави механизмот повеќе политички, отколку класичен мировен модел.
Политички извори за „Гардијан“ тврдат дека поранешниот британски премиер Тони Блер би можел да биде втор човек во хиерархијата под Трамп.
Што предвидува резолуцијата?
- Создавање Меѓународни стабилизациски сили (МСФ), кои би влегле во Газа до јануари.
- Нивна задача: обезбедување на границите, одржување ред, поддршка на хуманитарна помош и постепена демилитаризација.
- Израелските сили би се повлекувале во фази – но само по исполнување на одредени услови.
- Палестинска полиција, обучена од меѓународните трупи, треба да учествува во обезбедување на територијата.
Американските дипломати наведуваат дека силите би биле составени од држави со муслиманско мнозинство, како Индонезија или Азербејџан, но ниту една земја засега нема донесено конечна одлука.
Големи предизвици
Хамас веќе соопшти дека одбива каква било форма на разоружување.Аналитичарите предупредуваат дека ќе биде исклучително тешко да се најдат палестински технократи подготвени да работат под структура што ја води Трамп – а уште потешко да имаат реален авторитет кај населението во Газа.
Сепак, искусниот американски експерт за Блискиот Исток, Арон Дејвид Милер, смета дека резолуцијата може да биде чекор кон идна палестинска држава.
Дали ова навистина ќе донесе мир – или ќе создаде нови тензии – останува да се види во наредните недели, кога Трамп ќе ги објави имињата на членовите на својот моќен „Одбор за мир“.
