Администрацијата на американскиот претседател Доналд Трамп подготвува ново намалување на бројот на американските војници стационирани во Европа, а според последните информации, се очекува повлекување на околу 5.000 припадници на вооружените сили.
Како што пренесува „Блумберг“, повикувајќи се на добро информирани извори, планираното намалување ќе биде значително помало од стравувањата на европските сојузници.
Претходно, дел од земјите членки на НАТО стравуваа дека Вашингтон би можел да повлече дури 25.000 од приближно 80.000 американски војници распоредени низ Европа.
Најголем дел од планираното намалување се очекува да се однесува на Германија, каде што се наоѓаат значајни американски воени капацитети.
Сепак, конечната одлука сè уште не е донесена и ќе ја има американскиот претседател Доналд Трамп.
Според информациите, заменик-министерот за одбрана задолжен за политички прашања, Елбриџ Колби, треба да достави официјален извештај за можните промени до министерот за одбрана Пит Хегсет.
Се очекува Хегсет на 1 декември да му ги претстави конечните препораки на Трамп.
Американскиот претседател во повеќе наврати ги критикуваше европските членки на НАТО поради, како што смета, недоволниот придонес во заедничката одбрана и недостигот на поддршка за американските операции против Иран.
Вашингтон подолго време бара европските сојузници да преземат поголем дел од одговорноста за сопствената безбедност.
„Америка не може да се грижи за одбраната на Европа повеќе од нашите сојузници, ниту да издвојува повеќе пари за неа“, порача претходно Хегсет.
Од друга страна, американските воени операции на Блискиот Исток во голема мера зависат од базите и логистичката инфраструктура во Европа, што е дополнителен фактор при разгледувањето на можните повлекувања.
Иако се најавува намалување на американското воено присуство, засега нема конечна одлука за обемот и распоредот на повлекувањето.
