Рeјтингот на поддршка за американскиот претседател Доналд Трамп падна на 32 отсто, што е најниско ниво во неговата политичка кариера, покажа новата анкета на Ројтерс и Ипсос.
Анкетата беше спроведена во текот на четири дена во кои Трамп исфрли три големи медиумски куќи од Белата куќа и разгледуваше можност за уривање на познатиот вашингтонски Кенеди центар за изведувачки уметности, доколку на него не може да се додаде и името на Трамп.
Истражувањето покажа дека гласачите сè помалку се определуваат за поддршка на републиканците на Трамп на меѓуизборите на 3 ноември, кои ќе одредат кој ќе го контролира Конгресот во наредните две години.
Вкупната поддршка за Трамп опадна во однос на анкетата од минатата недела, кога изнесуваше 35 проценти, при што поддршката меѓу самите републиканци падна од 82 на 73 проценти во споредба со претходната недела.
Незадоволството меѓу републиканците од инфлацијата расте откако Трамп започна војна против Иран во февруари, што доведе до нагол раст на цените на бензинот и дизелот.
Сега, за првпат, републиканците кои не го одобруваат постапувањето на Трамп со трошоците за живот бројчано ги надминуваат оние кои му даваат поддршка.
Според анкетата, 51 отсто не се задоволни од неговиот учинок во тој поглед, додека 44 проценти го поддржуваат.
Рејтингот на одобрување за Трамп е понизок од кој било забележан за неговиот демократски претходник, Џозеф Бајден, чие претседателство исто така беше одбележано со скок на инфлацијата и кој на крајот ја заврши својата кандидатура за повторен избор откако лошиот резултат на дебатата ги засили загриженостите за неговите години.
Само 34 проценти од испитаниците во најновата анкета ги одобруваат нападите врз Иран.
Порано овој месец, републиканскиот лидер вети дека војната ќе заврши веднаш по изборите. Иран, меѓутоа, не покажа знаци на откажување, а последните недели Техеран и неговите сојузници се закануваа со дополнителни нарушувања на пазарите на нафта.
Околу 82 отсто од испитаниците, вклучувајќи девет од десет демократи и три четвртини од републиканците, изјавиле дека конфликтот најверојатно ќе биде долготраен.
Анкетата на Ројтерс и Ипсос покажа дека 43 отсто од регистрираните гласачи на среднорочните избори ќе изберат демократи, додека 35 проценти ќе се определат за републиканците.
Разликата од 8 поени е најголема предност за демократите во анкетите на Ројтерс и Ипсос оваа година, наведува агенцијата.
За републиканците, губењето на контролата над кој било од двата дома на Конгресот би можело да ја компликува агендата на Трамп во текот на последните две години од неговиот мандат.
Трамп и понатаму ужива поддршка од републиканците кога станува збор за имиграцијата, при што го поддржуваат 79 отсто од членовите на неговата партија, но севкупно само 36 проценти од Американците го поддржуваат неговиот пристап кон тоа прашање, додека 55 проценти не го одобруваат.
Резултатите од анкетата покажаа исто така дека околу 35 проценти од испитаниците го одобруваат пристапот на Трамп во борбата против криминалот, додека 50 проценти не го одобруваат.
Анкетата на агенциите Ројтерс и Ипсос беше спроведена преку интернет и опфати 1.277 возрасни лица од сите делови на САД.
