Страшна несреќа ја потресе Велика Британија – деветмесечно бебе почина во неделата навечер по напад од куче во местото Рогиет, во областа Гвент, Велс.
Инцидентот се случил околу 18 часот по локално време, кога службите за итни случаи и полицијата биле итно повикани во семејниот дом. И покрај обидите за реанимација, бебето починало на самото место од тешките повреди.
Полицијата потврди дека кучето кое го извршило нападот е запленето и отстрането од имотот, а во тек е детална истрага за да се утврдат сите околности околу трагедијата. Засега не е објавено која раса било животното, ниту дали семејството го чувало.
Главниот началник на полицијата во Гвент, Џон Дејвис, изјави дека јавноста е длабоко вознемирена од овој настан, но увери дека полицијата работи со полна сила за да ги расветли сите детали:
„Разбираме дека има загриженост и вознемиреност во јавноста. Нашите тимови се на терен и ќе продолжат со истрагата. Ги повикуваме сите кои имаат информации да не контактираат,“ изјави Дејвис.
Овој трагичен случај повторно ја отвора темата за безбедноста на децата во присуство на домашни миленици, особено кога станува збор за поголеми и потенцијално опасни раси.
Властите најавија дека резултатите од обдукцијата и истрагата ќе бидат објавени наскоро, а заедницата во Рогиет останува во шок поради загубата што ја потресе цела Велика Британија.
