Цените на нафтата на меѓународните пазари повторно бележат раст, при што европската референтна цена се приближи до 106 долари за барел. Причина за новиот скок е разочарувањето на пазарите од досегашниот исход на индиректните разговори меѓу САД и Иран, од кои се очекуваше напредок кон нормализирање на испораките преку Ормускиот теснец.
На лондонскиот пазар барелот поскапе за 2,81 долар и достигна 105,89 долари, додека на американскиот пазар цената се зголеми за 2,55 долари, на 94,71 долар.
Инвеститорите изминатите денови внимателно ги следеа пораките од Вашингтон и Техеран за време на Генералното собрание на ОН. Иако американски и ирански претставници одржале долги индиректни разговори, нивните позиции за решавање на конфликтот и натаму остануваат значително оддалечени.
Меѓу темите на разговорите биле повторното отворање на Ормускиот теснец и укинувањето на американската блокада. Техеран сигнализирал дека отворањето на теснецот би можело да биде разгледано доколку Вашингтон го намали воениот притисок и ја укине блокадата на иранските пристаништа.
Аналитичарите предупредуваат дека физичкиот пазар на нафта сè уште е далеку од целосно нормализирање. Во цената на нафтата во Лондон и понатаму е вграден значителен геополитички ризик, како и повисоките транспортни трошоци поради нарушувањата на Блискиот Исток и околу Ормускиот теснец.
Податоците на ОПЕК, пак, покажуваат дека барел од нивната референтна „кошница“ во средата чинел 107,69 долари, откако поевтинил за 1,50 долари.
