Вистинска драма и настан кој го запре здивот на целата јавност се случи за време на големата студентска прослава во студентскиот град Атенс. Забавата која започна со општо водушевување и славење на големата спортска победа на локалниот тим со резултат 41-13, за миг се претвори во вистински кошмар кога млада студентка се најде во животозагрозувачка ситуација.
Кристин Сарџент, 21-годишна студентка на завршната година по финансии и маркетинг на Универзитетот во Џорџија, за влакно избегна најтрагичен исход откако доживеа застрашувачки пад од осмиот кат од луксузниот станбен комплекс „Ремблер“.
Инцидентот се случил во саботата вечерта кога атмосферата во целиот град била на врвот. Додека била во друштво на своите пријатели, Кристин во еуфорија танцувала на кауч кој бил поставен во непосредна близина на отворен прозорец. Во еден момент го изгубила балансот и поминала низ заштитната мрежа, паѓајќи од огромна височина.
Според службениот извештај на полицискиот службеник Ерик Елисон, девојката не паднала директно на улицата, туку се приземјила на платото со базен кое се наоѓа во внатрешниот двор на вториот кат од објектот. Ова значи дека нејзиниот пад траел цели шест ката. На местото на настанот било забележано дека таа при падот најпрво удрила во метална клупа, каде што перницата била со траги од крв, а потпирачот за раце целосно искршен. Сведоците исто така наведуваат дека ударот дополнително го ублажила и пластична лежалка покрај базенот, што одиграло клучна улога во нејзиното преживување.
Нејзиниот татко, Ричард Сарџент, кој заедно со семејството итно пристигна од Вирџинија, потврди за медиумите дека неговата ќерка е свесна, се наоѓа на одделението за интензивна нега и веќе комуницира со најблиските. Тој пренесе дека Кристин успеала да се чуе со своја пријателка и ѝ ги кажала првите зборови по несреќата: „Хеј, жива сум. Не можам да верувам“. Иако има повеќекратни прекршувања на коските и сериозни повреди, семејството е оптимистично бидејќи таа е голем борец.
Полициската истрага покажа дека станува збор за несреќен случај. Управата на објектот веднаш испрати предупредување до сите станари, потсетувајќи ги дека сите прозорци се опремени со безбедносни граничници кои спречуваат нивно целосно отворање и апелираше да не се преправаат овие механизми. Во меѓувреме, во холот на зградата е поставен голем постер каде десетици колеги и пријатели оставаат пораки за нејзино брзо заздравување.
