Грчката полиција уапси 26-годишен државјанин на Авганистан под сомнение дека е одговорен за смртта на 38-годишната Шкотланѓанка Елизабет-Џејн Рос, чие тело беше пронајдено во куфер во напуштена зграда во атинската населба Кипсели.
Телото на жената било откриено на 18 јули од бездомник, а истрагата покажала дека таа најверојатно починала пет до седум дена претходно. Во меѓувреме, нејзиниот мобилен телефон бил користен за испраќање пораки, а подоцна и нејзината банкарска картичка била употребена за подигнување пари.
Според грчките власти, осомничениот работел како чистач во зградата каде што престојувала Рос. До него стигнале по анализа на снимките од безбедносните камери, а полицијата соопшти дека тој го признал делото.
Истражителите се сомневаат дека по смртта на жената, осомничениот го ставил нејзиното тело во куфер и го однел во напуштената зграда каде што подоцна било пронајдено.
При претрес во неговиот дом биле пронајдени реплика на пиштол и нож. Против него е поднесена кривична пријава за убиство, грабеж и прекршување на законите за оружје.
Жртвата, која потекнувала од Единбург, пристигнала во Грција на 26 јуни. Првично престојувала кај пријатели во Пиреја, а подоцна требало да се сретне со американски пријатели во Атина, но околностите околу тоа сè уште се предмет на истрага.
Британското Министерство за надворешни работи соопшти дека обезбедува конзуларна поддршка за семејството на Елизабет-Џејн Рос, додека полицијата во Шкотска потврди дека соработува со грчките власти во истрагата.
