Осумгодишно девојче е тешко повредено откако било нападнато од волк во зоолошка градина во германската покраина Бранденбург. Поради сериозноста на повредите, детето итно било пренесено во болница со медицински хеликоптер, соопштила локалната полиција.
Според информациите што ги пренесува германскиот весник „Дер Шпигел“, во моментот на нападот со девојчето биле уште две деца и еден вработен во објектот. Засега не се наведени дополнителни детали за околностите под кои дошло до инцидентот.
Зоолошката градина се наоѓа на околу 45 километри јужно од Берлин и е во приватна сопственост. По нападот, објектот бил привремено затворен за посетители.
Според информациите објавени на официјалната веб-страница на комплексот, таму се чуваат повеќе видови диви животни, меѓу кои кафеави мечки, рисови, сиви волци и поларни волци.
Ова не е прв безбедносен инцидент во зоолошката градина
Објектот и претходно бил во центарот на вниманието поради сериозен безбедносен инцидент. Во 2016 година, од истата зоолошка градина избегале два лава, по што била организирана обемна полициска операција за нивно пронаоѓање.
Најновиот случај повторно го отвора прашањето за безбедноста на посетителите во објектите во кои се чуваат диви животни, особено кога станува збор за деца.
