Голем сајбернапад предизвика сериозни проблеми во стотици супермаркети низ Франција, откако хакери успеале далечински да го нарушат функционирањето на системите за ладење и замрзнување.
Според француските медиуми, нападот погодил неколку големи трговски синџири, меѓу кои „Интермарше“ и „Кооператив У“.
Погодени биле меѓу 150 и 200 продавници на „Интермарше“ и речиси 100 продажни објекти на „Кооператив У“.
Како што објави француската телевизија БФМ ТВ, напаѓачите успеале од далечина да ги променат поставките на ладилниците и да активираат принудно одмрзнување.
Поради зголемувањето на температурата, големи количини свежа и замрзната храна станале неупотребливи, поради што маркетите биле принудени да ги отстранат производите од продажба.
Раководството на „Кооператив У“ го оцени нападот како незапаметен и неприфатлив, нагласувајќи дека е загрозена опрема неопходна за безбедно чување на храната.
Во меѓувреме, париското обвинителство отвори истрага за утврдување на размерите на нападот, идентитетот на сторителите и вкупната материјална штета.
Истражителите проверуваат и пријави за пожари, но засега не е потврдено дали тие се директно поврзани со сајбернападот.
Трговските компании предупредуваат и на можни проблеми со осигурувањето, бидејќи одредени полиси можеби не покриваат штета предизвикана од вакви инциденти.
Засега не е познато кој стои зад нападот.
Случајот повторно ја отвори дебатата за безбедноста на дигиталните системи од кои зависат снабдувањето со храна и секојдневното функционирање на големите трговски синџири.
