Јужниот дел на Мексико денеска беше погоден од силен земјотрес со јачина од 6,3 степени според Рихтеровата скала, кој ја зафати сојузната држава Гереро. Според податоците на Германскиот истражувачки центар за геонауки, епицентарот на потресот бил на релативно мала длабочина од околу 10 километри, што придонело земјотресот да биде силно почувствуван во поширокиот регион.
Претседателката на Мексико, Клаудија Шајнбаум, преку објава на социјалната мрежа „Икс“ информираше дека веднаш стапила во контакт со гувернерот на Гереро и дека, според првичните информации, нема пријави за сериозни материјални штети или повредени лица.
Таа дополнително нагласи дека нема евидентирани оштетувања ниту во главниот град Мексико Сити. Во моментот кога земјотресот се случил, Шајнбаум се наоѓала на редовна утринска прес-конференција. По активирањето на системот за предупредување, таа го прекинала обраќањето и заедно со новинарите мирно се евакуирала од просторијата, во согласност со безбедносните протоколи.
Надлежните служби продолжуваат да ја следат состојбата и да вршат проверки на терен, додека граѓаните се повикуваат на внимателност поради можни последователни потреси.
