Иако глобално годишно се консумираат повеќе од 210 милиони хектолитри вино, светските трендови покажуваат дека вкупната потрошувачка постепено опаѓа и денес е на најниско ниво во последните повеќе од 60 години. Сепак, љубовта кон виното во одредени земји останува силна и длабоко вкоренета во секојдневието.
Нова анализа објавена од Visual Capitalist, базирана на најсвежи достапни податоци, открива кои народи пијат најмногу вино по глава на жител и резултатите се прилично јасни.
На самиот врв се најде Португалија, со просечна годишна потрошувачка од дури 61,1 литар вино по лице. Оваа бројка ја издвојува земјата далеку пред сите останати, со значителна разлика во однос на второто место.
Веднаш зад неа е Италија, каде просечната потрошувачка изнесува 42,7 литри по жител, што е за цели 18,4 литри помалку од португалскиот просек. Третото место го зазема Франција со 41,5 литри, земја која со децении се смета за симбол на винската култура, но сепак останува зад Португалија и Италија.
Во првите пет се вбројуваат и Швајцарија со 29,7 литри и Австрија со 28,6 литри по глава на жител.
Интересно е што речиси целата топ 10 листа е доминирана од европски земји. Единствен исклучок е Австралија, која се најде на шестото место со 24,5 литри. Истата количина ја бележи и Германија на седмата позиција, додека следуваат Унгарија со 24,4 литри, Шпанија со 23,8 литри и Велика Британија со 22,3 литри по жител.
Анализата посочува дека доминацијата на Португалија не е случајна. Земјата има силно домашно производство на вино и исклучително ниска стапка на ДДВ за негазирано вино од само 13 проценти, што е најниска во целата Европска унија. Ова ја прави винската култура подостапна и подлабоко присутна во секојдневниот живот.
Наспроти тоа, надвор од Европа бројките се значително пониски. Во Соединетите Американски Држави просечната потрошувачка изнесува само 11,8 литри по глава на жител, што е речиси идентично со разликата помеѓу Франција и Швајцарија. Канада е малку над овој просек со 13,7 литри, додека земји како Јапонија, Бразил и Кина се наоѓаат на самото дно на глобалната листа со минимална консумација на вино.
Податоците јасно покажуваат дека, и покрај глобалниот пад, Европа останува срцето на светската винска култура, а Португалија моментално е апсолутниот лидер кога станува збор за љубовта кон виното.
