Германија прави решителен чекор кон почиста животна средина и поздрави градови, воведувајќи драстични и ригорозни правила за греењето на домовите. Старите системи на јаглен и кокс полека, но сигурно заминуваат во историјата, а греењето на дрва ќе биде дозволено само под строги услови и контроли.
Новите прописи предвидуваат сериозни ограничувања за сопствениците на домови кои користат традиционални печки. Доколку не се почитуваат правилата, следуваат високи парични казни, а за одредени типови печки ќе важи и ограничено користење – само во точно определени денови од месецот, во зависност од загадувањето и временските услови.
Особено строго е забрането согорување на материјали кои испуштаат опасни честички и токсини. Тоа вклучува пластика, гума, обоено или лакирано дрво, хемиски обработено дрво, како и весници, отпадна хартија и материјали од дрвени влакна. Овие практики се сметаат за сериозна закана по јавното здравје и квалитетот на воздухот.
Германските пратеници јасно порачуваат дека заштитата на општото добро, здравјето на граѓаните и борбата против загадувањето се главните причини за ваквите строги мерки. Целта е постепено намалување на емисијата на штетни честички, особено во густо населените урбани средини.
Од 2026 година, во Германија целосно ќе биде забранета инсталацијата на нови системи за греење на јаглен и кокс. Постојните системи ќе мора постепено да се повлекуваат од употреба, со краен рок до 2045 година, кога ваквите начини на греење целосно треба да исчезнат.
Греењето на дрва нема целосно да се укине, но ќе биде дозволено исклучиво со чисто, суво и необработено дрво. Притоа, сопствениците ќе мора строго да ги почитуваат лимитите за емисија на штетни честички и да користат печки што ги исполнуваат најновите еколошки стандарди.
Со овие мерки, Германија испраќа јасна порака: енергетската транзиција и заштитата на животната средина нема да бидат препорака, туку обврска што ќе важи за сите.
