Поранешниот британски премиер Харолд Вилсон велеше дека „една недела во политиката е долго време“, а изминатите денови го потврдија тоа. Изјавите на американскиот претседател Доналд Трамп за Гренланд, заканите со царини, критиките кон НАТО-сојузниците за Авганистан и формирањето Комитет за мир во Газа, во кој беа вклучени и Владимир Путин и белорускиот претседател, испратија порака дека стариот светски поредок е минато, пишува CNN.
Канадскиот премиер Марк Карни на Светскиот економски форум во Давос оцени дека светот не е во транзиција, туку во распад, предупредувајќи дека државите кои нема да учествуваат во носењето одлуки ќе станат нивна жртва. Неговите зборови предизвикаа силна реакција од Трамп.
Во Европа сè појасно се забележува отстапување од тивкото прилагодување кон поотворен отпор. Заканите на Трамп за царини кон осум европски земји поради поддршката на данскиот суверенитет над Гренланд ја разгневија ЕУ, која најави реципрочни мерки, додека Европскиот парламент го стави на чекање трговскиот договор со САД. Велика Британија, Франција, Германија и Италија ја одбија поканата да учествуваат во мировниот комитет.
Иако Трамп подоцна ја омекна реториката, европските лидери предупредија дека се преминати „многу црвени линии“. Претседателката на Европската комисија, Урсула фон дер Лајен, порача дека Унијата мора да работи на поголема независност.
Аналитичарите предупредуваат дека нови трансатлантски тензии се само прашање на време, особено поради економската зависност на Европа од САД. Дали Европа ќе одговори со единство и решителност, останува отворено прашање.
