Шпанија упати остра порака до САД поради покрената истрага за случај на еутаназија во Барселона, што отвори нов дипломатски спор околу човековите права и правото на достоинствена смрт.
Повод за реакцијата е протечен дипломатски документ, според кој на американската амбасада во Мадрид ѝ било наложено да ја испита одлуката на шпанските власти да дозволат еутаназија на 25-годишната Ноелија Кастиљо. Таа била жртва на сексуално насилство, а по обид за самоубиство останала парализирана и во постојани болки.
Министерката за здравство Моника Гарсија директно му порача на американскиот претседател Доналд Трамп да не се меша во внатрешните работи на земјата, потенцирајќи дека Шпанија има јасен и законски уреден систем што го регулира правото на достоинствена смрт.
Критиките ги отфрли и претседателот на Каталонија Салвадор Иља, кој нагласи дека ќе ги брани здравствените институции од, како што рече, неосновани напади и надворешни притисоци.
Еутаназијата во Шпанија е легална од 2021 година, а ваквите прашања не се уредени на ниво на Европската Унија, што значи дека секоја држава самостојно ги дефинира своите правила и законска рамка.
Случајот дополнително ги отвори дебатите за границите на меѓународното влијание врз чувствителни прашања како што се здравствените политики и човековите права.
