Нов сој на Ковид-19, познат како BA.3.2 и неформално наречен „Цикада“, се појави во САД и веќе е детектиран во повеќе европски земји, предизвикувајќи внимание кај научниците.
Според Centers for Disease Control and Prevention (CDC), овој сој се издвојува по исклучително голем број мутации – дури од 70 до 75, што е повеќе од двојно во однос на досегашните доминантни варијанти.
Се шири, но засега не е алармантен Иако BA.3.2 е откриен во голем број американски држави и уште десетици земји, моментално учествува со мал процент од вкупните случаи. Експертите велат дека засега не покажува знаци на непосредна опасност, но неговата способност за мутација остава простор за загриженост.
Веќе присутен и во Европа Овој сој е регистриран и во делови од Европа, како Данска, Германија и Холандија. Во одреден период, дури 30% од анализираните примероци во овие земји биле поврзани со BA.3.2.
Големиот број мутации му овозможува делумно да ја избегне заштитата стекната преку вакцинација или претходна инфекција, особено поради промените во т.н. „спајк“ протеин.
Вакцините сè уште штитат од тешка форма Според World Health Organization, постојните вакцини и терапии и натаму обезбедуваат заштита од потешки форми на болеста, иако нивната ефикасност може да биде делумно намалена.
Кои се симптомите? Засега, симптомите не се значително различни од претходните варијанти. Најчесто се јавуваат:
- силна болка во грлото
- кашлица и кивање
- покачена температура
- замор и болки во мускулите
- губење на вкус и мирис
- главоболка, мачнина или дијареја
- отежнато дишење
Дали нè чека нов бран? Научниците не исклучуваат можност „Цикада“ да предизвика нов, можеби летен бран на инфекции, но засега нема доволно податоци за такво сценарио. Во моментов, бројот на случаи во САД покажува тренд на опаѓање, а доминантен останува друг сој.
Експертите нагласуваат дека клучно е континуираното следење на вирусот и навремената адаптација на здравствените мерки.
