Северна Кореја утрово истрела неколку балистички проектили со краток дострел кон Источното Море, познато и како Јапонско Море, јави јужнокорејската новинска агенција Јонхап, повикувајќи се на информации од Генералштабот на јужнокорејската армија (JCS).
Според извештаите, проекциите биле забележани околу 8:10 часот наутро по локално време (23:10 по Гринич, вечерта претходниот ден). Засега не се објавени дополнителни технички детали за лансирањата – како точната бројка на проектили, нивниот дострел или точните траектории.
Ова е прва ваква воена активност на Пјонгјанг по доаѓањето на власт на новиот претседател на Јужна Кореја, Ли Џе Мјунг, кој ја презеде функцијата на почетокот на јуни. Последен пат Северна Кореја лансираше слични проектили – и балистички и крстосувачки – во мај.
Иако ваквите лансирања станаа речиси рутина, тие остануваат директно кршење на резолуциите на Обединетите нации, според кои Северна Кореја нема право да тестира ниту да лансира балистички ракети, без разлика на нивниот дострел. Станува збор за проектили земја-земја, кои, покрај конвенционално вооружување, можат да бидат и носачи на нуклеарни боеви глави.
Во последните неколку години, Пјонгјанг драстично го интензивираше развојот и тестирањето на ракетни системи, паралелно со агресивна реторика кон САД и Јужна Кореја, но и со сè потесна воена соработка со Русија, што ги зголемува геополитичките тензии на регионот.
Меѓународната заедница внимателно го следи развојот на ситуацијата, особено имајќи предвид дека ваквите ракетни тестови се сметаат за провокација и закана по регионалната безбедност, како и за можен сигнал на политички и воен притисок во контекст на тековните меѓународни односи.
