Додека војната во Украина трае веќе петта година, Русија се подготвува за одбележување на Денот на победата на 9 мај, но овогодинешната прослава во Москва значително се разликува од претходните години. Наместо вообичаена спектакуларна воена парада, атмосферата е исполнета со тензии, безбедносни мерки и страв од можни напади со дронови.
Според најавите од Кремљ, Русија прогласила еднострано примирје од 8 до 9 мај, со цел безбедно одржување на свеченоста. Сепак, Украина предложила прекин на огнот да започне неколку дена порано, при што двете страни се обвинуваат меѓусебно за ескалација и провокации.
Руските власти предупредиле дека секој обид за нарушување на парадата би можел да резултира со „масовен ракетен удар врз Киев“, додека истовремено ги повикуваат странските дипломатски мисии и цивилите да го напуштат градот заради безбедност. Овие закани дополнително ја зголемуваат тензијата во регионот.
Во меѓувреме, Киев тврди дека руските сили продолжуваат со напади врз украинска територија, што според украинското раководство го прави предложеното примирје неискрено и тактички мотивирано. Претседателот Володимир Зеленски нагласува дека Украина ќе реагира „симетрично“ на секој напад.
Дополнителна драма предизвикаат и последните инциденти, вклучително и напад со дрон врз станбен комплекс во Москва, кој се наоѓа на само неколку километри од Кремљ. Овие случувања ја засилуваат загриженоста дека парадата би можела да биде цел на воздушни напади.
Оваа година, воена парада во Москва ќе биде значително скромна во споредба со претходните години. Наместо голема демонстрација на воена сила со тешка техника, ќе има ограничен број на единици и симболичен прелет на авијацијата. Дел од воената опрема, вклучувајќи напредни системи и ракетни комплекси, нема да биде прикажана.
Безбедносните мерки се на највисоко ниво, со распоредени противвоздушни системи во центарот на Москва и сериозни ограничувања на движењето. Граѓаните веќе пријавуваат прекини во мобилните мрежи и GPS сигналот, што властите го објаснуваат како дел од заштитните мерки против можни напади со дронови.
Аналитичарите предупредуваат дека главната причина за изменетиот формат на парадата е стравот од украински беспилотни летала, кои би можеле да ги погодат воените колони или чувствителни цели во самиот центар на градот. Дополнително, дел од експертите сметаат дека Русија се соочува и со ограниченост на воената опрема поради тековните борби на фронтот.
Иако парадата официјално се одржува како симбол на победата во Втората светска војна, оваа година таа се претвора во настан под силен притисок, безбедносни стравови и политички пораки меѓу двете завојувани страни.
