Во Владата се одржа средба со претставници и атлети од Специјална Олимпијада Македонија, како и со тимот на Специјална Олимпијада Европа–Евроазија (SOEE), на која се разговараше за нова иницијатива што има за цел да го промени начинот на кој децата се вклучуваат во спортските активности во образовниот систем.
Главниот фокус на иницијативата е воведување на таканаречени „Unified“ спортски активности во училиштата, каде заедно ќе учествуваат ученици со и без попреченост. Овој концепт е дел од поширока глобална кампања која преку спортот промовира еднаквост, прифаќање и инклузија меѓу младите.
Од владината страна е истакнато дека иницијативата добива целосна поддршка и дека Македонија ќе биде активно вклучена во нејзината реализација. Според најавите, преку вакви програми се очекува да се создаде средина во која спортот ќе биде достапен за сите деца, без разлика на нивните можности или физички ограничувања.
Во спроведувањето на проектот ќе бидат вклучени повеќе институции, меѓу кои Министерството за спорт, Министерството за образование и наука, како и Министерството за социјална политика, демографија и млади. Целта е да се воспостави систем кој ќе овозможи еднакви услови за учество во спортските активности во рамки на училиштата.
Иницијативата се оценува како значаен чекор кон создавање поинклузивно општество, во кое секое дете ќе има можност да биде активно, прифатено и вклучено во спортот без бариери.
