Семејството на 23-годишниот Вилијам Чепмен, кој трагично го загуби животот по напад од сибирски тигар во зоолошки парк во северна Англија, првпат јавно проговори за трагедијата што ја потресе британската јавност.
Во емотивно соопштение, неговите најблиски открија дека Вилијам со години се соочувал со сериозни психички здравствени проблеми и примал пропишана терапија.
Трагедијата се случила во саботата попладне, кога младиот човек сам го посетил паркот „Јоркшир вајлдлајф“.
Според информациите, нешто по 13:30 часот тој успеал да влезе во оградениот простор во кој се наоѓал сибирски тигар по име Алтај.
Пред очите на посетителите, животното го нападнало 23-годишникот. Вработените испукале предупредувачки истрели за да го оддалечат тигарот, кој потоа се повлекол во засолниште.
И покрај интервенцијата на итната медицинска помош, за Вилијам немало спас. Смртта била констатирана на самото место.
Семејството го опишало како интелигентен, срдечен и комуникативен млад човек, кој бил неизмерно сакан од своите најблиски.
„За жал, Вилијам со години се соочуваше со сериозна психичка болест, поради која му беа препишани силни лекови“, навеле неговите роднини.
Тие нагласиле дека надлежните институции треба да утврдат дали неговата здравствена состојба имала некакво влијание врз трагичниот настан.
Семејството упати и посебен апел до јавноста да престане со споделување на вознемирувачките видеоснимки од нападот, бидејќи нивното ширење им предизвикува дополнителна болка.
„Се надеваме дека надлежните ќе направат сè за да утврдат зошто нашиот прекрасен син го направи тоа што го направи“, порачале најблиските.
По трагедијата се дознало дека Вилијам како дете се занимавал со актерство. Во 2009 година настапил во телевизиската серија „May Contain Nuts“, а во 2012 година се појавил и во образовната серија „True Stories“ на Би-Би-Си.
Од актерската школа што ја посетувал се простиле со емотивна порака, истакнувајќи дека ќе го паметат со голема љубов.
Во меѓувреме, надлежните започнале истрага за безбедносните услови во зоолошкиот парк, кој останал затворен и петтиот ден по трагедијата.
Истрагата треба да утврди како младиот човек успеал да влезе во просторот на тигарот, како и кои околности довеле до неговата смрт.
