Најмалку две лица се повредени во руски напад врз Северниот мост во Киев, соопшти градоначалникот на украинската престолнина, Виталиј Кличко.
Според информациите што ги објавија украинските власти, на едно од повредените лица му била укажана медицинска помош на местото на настанот, додека другото било пренесено во болница.
Во нападот бил оштетен коловозот на Северниот мост над реката Днепар, поради што сообраќајот е ограничен. Дел од сообраќајните ленти и понатаму се користат, но движењето низ овој важен дел од градот е отежнато.
Руското Министерство за одбрана соопшти дека мостот бил цел на напад со дронови, тврдејќи дека тој има значење за движењето на украинските сили и транспортот на воена опрема. Украинските власти, пак, пријавија последици и повредени лица.
Дополнителни проблеми во Киев предизвикале и последиците од неодамнешните воздушни напади. Во делови од градот се појавила густа сива магла и намалена видливост, што украинските служби го поврзуваат со чадот и честичките ослободени по пожарите и експлозиите.
На жителите на одредени подрачја им било препорачано да останат во затворени простории, да ги затворат прозорците и, доколку имаат можност, да користат прочистувачи на воздух.
Возачите биле повикани на дополнителна внимателност поради намалената видливост и да ги користат светлата за магла.
Ситуацијата во Киев останува напната по серијата руски воздушни напади во последните денови, додека властите продолжуваат да ја проценуваат штетата врз инфраструктурата.
