Уште една онлајн платформа која ветуваше лесна заработка преку инвестиции исчезна преку ноќ, оставајќи илјадници корисници без пристап до своите средства. Апликацијата Nuvonex, која функционираше преку домените nuvonex.org и nuvonex.top, повеќе не е достапна, а корисниците наместо состојба на сметките добиваат само порака за техничка грешка – „Error 522“.
Станува збор за сценарио од кое финансиските експерти со месеци предупредуваа, но кое многу инвеститори одбиваа да го прифатат. Само за помалку од 24 часа, платформата целосно исчезна, а со неа и депонираните средства на илјадници луѓе, најмногу од Словенија.
Според досегашните информации, моделот на работење носел сите карактеристики на класична пирамидална, односно Понзиева шема. Во почетната фаза, исплатите биле редовни, што создало чувство на сигурност и привлекло нови корисници. Како што бројот на вложувачи растел, почнале и доцнењата со исплатите.
Непосредно пред целосното згаснување, корисниците добиле известување дека можат да ги повлечат своите средства само доколку итно уплатат дополнителни 100 долари во криптовалутата USDT. Дел од нив, во обид да ги спасат претходните вложувања, ја извршиле и оваа уплата – по што платформата целосно престанала да функционира.
Истражувањата на словенечките медиуми покажуваат дека дигиталните траги водат кон Азија. Дел од кодот на веб-страниците бил на кинески јазик, а администраторите на социјалните мрежи се поврзуваат со Камбоџа, земја која често се споменува како база за вакви онлајн измами.
Случајот со Nuvonex повторно ја отвора темата за ризиците од апликации и платформи што ветуваат „брза и сигурна заработка“, особено во крипто-светот, каде контролата и заштитата на корисниците се минимални.
