Њујорк воведе вонредни мерки поради силна зимска бура што го погоди североистокот на САД, при што беа затворени јавните училишта, ограничено движењето и активирани дополнителни служби за итна помош. Гувернерката на Њујорк, Кети Хочул, прогласи вонредна состојба за повеќе окрузи и активираше припадници на Националната гарда за поддршка во најпогодените делови, вклучително и Њујорк Сити, Лонг Ајленд и Долната долина Хадсон.
Градоначалникот Зохран Мамдани, пак, прогласи локална вонредна состојба во Њујорк и воведе ограничување за движење на несуштински возила за да им се овозможи на службите за чистење и итните екипи непречено да интервенираат. Воедно, јавните училишта беа затворени, а беа откажани и дел од градските услуги и програми.
Според прогнозите, бурата носеше опасна комбинација од обилен снег, силни ветрови и можни крајбрежни удари, што го зголеми ризикот од паднати дрвја, прекини на струја и сериозни проблеми во сообраќајот. Reuters јави за големи нарушувања во патниот и авионскиот сообраќај низ североистокот поради снежната бура.
И покрај драматичните предупредувања и фотографии од делови погодени со висок снег, во делови од Менхетен по минувањето на бурата, впечатокот кај дел од граѓаните беше дека последиците изгледале помали од очекуваното. Сепак, властите порачаа дека претпазливоста била неопходна поради прогнозираниот интензитет и ризиците што ги носеше невремето.
