Филипини прогласија вонредна состојба во енергетскиот сектор поради последиците од конфликтот меѓу САД, Израел и Иран, предупредувајќи на „непосредна опасност“ за снабдувањето со енергија.
Претседателот Фердинанд Маркос Јуниор изјави дека е формирано специјално тело кое ќе има задача да обезбеди стабилен тек на снабдување со гориво, храна, лекови и други основни потреби за населението.
Според него, прогласувањето на вонредната состојба ѝ овозможува на владата да преземе координирани мерки во рамки на законите, со цел да се одговори на ризиците од нарушеното глобално снабдување со енергија и можните последици врз домашната економија.
Дополнителен проблем претставува зависноста на регионот од транспортот на нафта преку Ормуски теснец, клучна поморска рута која е под силно влијание на Иран, што дополнително ја зголемува неизвесноста околу испораките.
Во обид да ја ублажат кризата, Филипините најавија дека овој месец ќе започнат со увоз на нафта од Русија – потег што се случува првпат по пауза од пет години.
Овој чекор покажува колку е сериозна ситуацијата, бидејќи земјата, која во голема мера се потпира на енергенси од Блискиот Исток, сега бара алтернативни извори за да избегне подлабока енергетска криза.
