Дете донело наполнет пиштол во ранец во градинка во Кантон, Мичиген, при што еден од родителите е уапсен по инцидентот. За среќа, никој не бил повреден.
Другиот родител не бил уапсен, а според шефот на полицијата во Кантон, Џозеф Биали, тој е полицаец во соседна јурисдикција. Информацијата ја пренесува „Детроит Фри Прес“.
Инцидентот се случил во „Детскиот свет – Центар за рано учење“. Според директорот на полицијата, случајот можел да има многу посериозни последици.
„Имаме голема среќа што никој не беше повреден за време на овој инцидент. Дете никогаш не треба да има пристап до такво оружје. Имавме среќа што не се случи нешто полошо“, изјавил Биали, пренесува весникот.
Според порака што директорот на градинката ја испратил до родителите, персоналот забележал дека детето има пиштол откако го извадило од ранецот. Оружјето, според информациите, било ставено во футрола.
Откако го забележале пиштолот, вработените веднаш реагирале и го обезбедиле оружјето, изјавил директорот на центарот.
Од градинката нагласиле дека најважно е што никој не бил повреден. Наставникот кој ја надгледувал групата останал смирен и ги следел предвидените безбедносни процедури.
По инцидентот, семејството на детето повеќе не е запишано во градинката. Од центарот објасниле дека оваа одлука е донесена како мерка за одржување на безбедноста и сигурноста на сите деца и членови на персоналот.
Случајот сега го истражуваат детективи од полициската станица во Кантон. Оттаму соопштиле дека по завршувањето на истрагата, предметот ќе биде доставен до Обвинителството на округот Вејн на разгледување.
Полицијата продолжува да ги утврдува сите околности под кои наполнетото оружје се нашло во ранецот на детето и како дошло до тоа да биде внесено во градинката.
