Пентагон објави нови, досега непознати детали за американскиот хиперсоничен систем за оружје познат како „Темниот орел“, кои излегоа на виделина за време на неодамнешната посета на министерот за одбрана Пит Хегсет на воздухопловната база Редстоун Арсенал во сојузната држава Алабама.
Во рамки на посетата, при која Редстоун Арсенал беше официјално прогласена за ново седиште на американската вселенска команда (SPACECOM), високи воени претставници презентираа клучни информации за дострелот, брзината и боевата глава на ова напредно оружје, објави специјализираниот портал „The War Zone“.
„Темниот орел“, официјално наречен хиперсонично оружје со долг дострел (LRHW), претставува мобилен ракетен систем кој се лансира од приколка. Ракетата се движи со брзина поголема од 5 маха и има способност за непредвидливо маневрирање низ атмосферата, што ја прави исклучително тешка за пресретнување од постоечките системи за противракетна одбрана.
Поради овие карактеристики, системот е наменет за уништување на добро заштитени, високо вредни и временски чувствителни цели, како што се командни центри, клучни системи за воздушна одбрана и напредни непријателски сензори. Станува збор за првото вистинско хиперсонично оружје на американската армија наменето за реална оперативна употреба, а истата ракетна технологија ќе ја користи и американската морнарица за лансирање од море.
За време на презентацијата, генерал-потполковник Франциско Лозано, кој е задолжен за развојот на хиперсоничните системи, откри дека „Темниот орел“ има дострел од дури 3.500 километри. Претходно официјално се споменуваше минимален дострел од 2.775 километри, што отвора прашања дали станува збор за технолошки напредок или за претходно намерно намалени бројки, што е честа пракса во воената индустрија.
Лозано ја нагласи стратешката моќ на оружјето, посочувајќи дека со ваков дострел системот може да ја погоди континентална Кина од Гуам, Москва од Лондон или Техеран од Катар. Тој истакна дека распоредувањето на вакви системи во региони како Филипините и Јапонија претставува сериозен фактор на одвраќање и ја става кинеската одбрана под постојан притисок.
Дополнително беше откриено дека „Темниот орел“ носи боева глава со тежина помала од 30 фунти, односно околу 13,6 килограми, што е исклучително малку за оружје со ваков дострел. Сепак, неговата разорна моќ не се темели на голем експлозивен полнеж, туку на огромната кинетичка енергија при удар, создадена од екстремната брзина.
Иако боевата глава е релативно мала, таа содржи и експлозивен фрагментациски елемент, кој е особено ефикасен против „помеки“ цели како што се радарски инсталации и батерии за воздушна одбрана. Според воените претставници, целосниот дострел од 3.500 километри може да биде совладан за помалку од 20 минути, што значително ја менува динамиката на современото војување и времето за реакција на потенцијалниот противник.
