Ако сакате да го почитувате законот во Словачка, ќе мора да пешачите максимум шест километри на час.
Словачкиот парламент усвои измени на Законот за сообраќај, со кои се воведува ограничување на брзината на тротоарите во урбаните средини до 6 км/ч. Ограничувањето важи за пешаци, велосипедисти, корисници на лизгалки, како и за возачи на тротинети и електрични тротинети, со цел да се спречат сè почестите судири.
„Главната цел е да се зголеми безбедноста на тротоарите, земајќи го предвид зголемениот број судири со возачи на скутери“, изјави Љубомир Важни, автор на амандманот и член на партијата Смер. Тој додаде дека законот ќе биде корисен и за документирање прекршоци, особено кога се утврдува дали некој се движел побрзо од дозволената брзина.
Законот стапува на сила од 1 јануари 2026 година, но засега не е објаснето како точно ќе се контролира и спроведува.
За споредба, просечната брзина на одење е меѓу 4 и 5 км/ч, додека 6,4 км/ч претставува умерено темпо за физички добро подготвено лице.
Опозицијата ја критикуваше мерката, предлагајќи наместо тоа да се забранат електричните тротинети на тротоарите. Мартин Пекар од либералната партија Прогресивна Словачка истакна дека вистинската опасност за пешаците се автомобилите, а не велосипедистите или тротинетите, и дека амандманот казнува одржливи начини на транспорт.
Промената во законот предизвика бран потсмев на социјалните мрежи, а многумина се прашуваат дали би можеле да бидат казнети ако трчаат за да го фатат автобусот.
