Нова воена ескалација на Блискиот Исток. Иранската Исламска револуционерна гарда соопшти дека извршила напад со шест беспилотни летала врз американска воена база во Бахреин, додека во земјата утрово биле активирани сирените за воздушна тревога.
Според соопштението на иранската Револуционерна гарда, цел на нападот бил американски радарски систем за противвоздушна одбрана во хеликоптерската база „Ал Рифа“.
Од Техеран тврдат дека операцијата ја извеле воздухопловно-вселенските сили на Револуционерната гарда, како одговор на американските воени дејства.
Иранската страна тврди дека нападот бил успешен, но засега нема независна потврда дека радарскиот систем бил погоден или оштетен.
Во меѓувреме, Министерството за внатрешни работи на Бахреин во текот на утрото издаде две предупредувања за потенцијална опасност.
Граѓаните биле повикани да останат смирени, да ги следат официјалните известувања и да се упатат кон најблиското безбедно засолниште.
Според извештаите на меѓународните медиуми, во Бахреин се слушнале експлозии и сирени за тревога, но точните околности на инцидентот сè уште се утврдуваат.
Ројтерс пренесува дека бахреинската противвоздушна одбрана пресретнала повеќе ирански воздушни напади.
Бахреин има големо стратешко значење за американската војска, бидејќи таму е стационирана Петтата флота на американската морнарица.
Инцидентот доаѓа во период на продолжени тензии меѓу Вашингтон и Техеран, по воените судири што започнаа на 28 февруари годинава.
Во последните месеци конфликтот се прошири и врз други земји во Персискиот Залив, каде што се наоѓаат американски воени објекти.
Засега нема потврдени информации за човечки жртви или материјална штета во американската база од најновиот пријавен напад.
