Полициски службеници од Секторот за внатрешни работи Велес спроведоа едукативна активност за подигнување на свеста кај младите за повеќе безбедносни ризици, со посебен акцент на врсничкото и сајбер-насилството.
На 13 ноември 2026 година, припадници на Отсекот за превенција и Отсекот за компјутерски криминал при СВР Велес одржаа предавање за учениците од ОСУ „Јовче Тесличков“ во Велес.
Во рамките на средбата, средношколците се запознаа со различните облици на врсничко и интернет-насилство, начините на кои се манифестираат овие појави, како и можните последици од нив.
Полициските службеници посебно ги истакнаа начините за навремено препознавање и спречување на насилничкото однесување, како и постапките што младите треба да ги преземат доколку се соочат со ваков проблем.
На што уште беше ставен акцент?
Превентивните активности опфаќаат и други теми важни за безбедноста на младите и граѓаните, меѓу кои заштитата од кражби, безбедноста во сообраќајот, препознавањето телефонски измами и спречувањето зависности.
Целта на ваквите едукативни средби е учениците да добијат корисни информации, полесно да ги препознаваат потенцијалните опасности и да знаат како да постапат за да се заштитат себеси и другите.
Преку директна комуникација со полициските службеници, младите имаат можност да се информираат за ризиците со кои може да се соочат во секојдневието и за важноста на навремената реакција и превенцијата.
