Украинскиот претседател Володимир Зеленски соопшти дека одобрил 40-дневна операција насочена кон зголемување на притисокот врз Русија, со цел Москва да биде принудена да ја заврши војната.
„Одобрив 40-дневна операција за влијание врз државата агресор и вршење притисок за завршување на војната“, објави Зеленски на Телеграм.
Според него, Украина ќе продолжи со операциите насочени кон руски воени и логистички цели, како и кон инфраструктурата што ја поддржува руската воена машинерија. Во изминатите месеци украинските сили извршија повеќе напади со среден и долг дострел врз цели во Русија и на териториите под руска контрола, особено врз објекти од нафтената индустрија.
Зеленски изјави дека руската воена логистика и присуството на окупираните територии претрпеле значителни загуби и оцени дека таквиот притисок треба да ја принуди Москва да седне на преговарачка маса.
„Нашите операции, вклучително и онаа поврзана со Крим, се внимателно пресметани. Доколку Украина ја добие поддршката што ја разговаравме со партнерите од Г7, брзо ќе создадеме услови што ќе ја принудат Русија да избере мир“, рече украинскиот претседател.
Тој додаде и дека украинските разузнавачки служби дошле до доверливи руски документи кои, според неговите тврдења, покажуваат дека руското раководство чувствува сериозен притисок поради украинската стратегија.
„Дојдовме до некои руски внатрешни документи кои даваат вистински увид во тоа што се случува. Руското раководство навистина чувствува огромен притисок поради нашите тактики“, изјави Зеленски.
