Најмалку 37 лица го загубиле животот, а 42 се повредени во руски напад со дрон врз складиште за муниција во близина на Киев, според првичните информации на украинските власти.
Нападот предизвикал серија силни експлозии, кои оставиле сериозни последици врз околината. Особено загрижува фактот што складиштето со воен материјал се наоѓало во близина на населени места, семејни куќи и објект во кој биле сместени стари лица и лица со попреченост.
Меѓу повредените има и четири деца, додека повеќе од 50 објекти биле оштетени. Поради опасноста од нови експлозии и последиците од нападот, од загрозеното подрачје биле евакуирани 381 лице.
МЕЃУ ЗАГИНАТИТЕ И ЛОКАЛЕН РАКОВОДИТЕЛ
Меѓу жртвите е и Тарас Дидич, раководител на локалната заедница Дмитривка.
Според достапните информации, Дидич бил меѓу првите кои се упатиле да им помогнат на жителите по првичниот удар. Додека траела интервенцијата, следувале нови силни експлозии, при што тој го загубил животот.
Спасувачките и безбедносните екипи продолжуваат со пребарувањето на погоденото подрачје, а бројот на жртви и повредени може дополнително да биде променет поради сериозноста на инцидентот.
ЗЕЛЕНСКИ БАРА ОДГОВОРНОСТ
Украинскиот претседател Володимир Зеленски остро реагираше по трагедијата и побара да се утврди кој дозволил складирање на големи количества експлозивен и воен материјал во непосредна близина на цивилно население.
Според неговата изјава, првиот удар го погодил складиштето на украинските вооружени сили, каде што се чувале гранати, мини, друга муниција и дронови.
Зеленски оцени дека ситуацијата отвора сериозни прашања за начинот на кој бил складиран воениот материјал и за безбедносните проценки направени пред да биде дозволено неговото чување на таа локација.
ОТВОРЕНА ИСТРАГА ЗА СЛУЖБЕНА НЕГРИЖА
По трагедијата, украинската полиција и Службата за безбедност на Украина – СБУ започнале истрага.
Еден од клучните сегменти на истрагата е сомнежот дека можеби станувало збор за сериозно службено невнимание при изборот на локацијата и организацијата на складирањето на муницијата.
Украинскиот премиер Сергиј Корецки исто така побара одговорност од сите лица кои учествувале во носењето одлуки поврзани со складирањето на воениот материјал. Тој оценил дека повторувањето на вакви пропусти во услови на војна претставува сериозен безбедносен проблем.
СЛИЧНА ТРАГЕДИЈА И ПРЕТХОДНО
Најновиот инцидент повторно ги отвори прашањата за безбедноста на воените складишта во Украина.
Сличен случај се случил во јули во местото Вишнево, исто така во Киевската област. Тогаш руски проектил погодил складиште за муниција поврзано со компанија во рамките на државниот одбранбен концерн „Укроборонпром“.
Во експлозиите тогаш загинале осум лица, а 29 биле повредени. По инцидентот биле најавени проверки и санкции, а биле сменети и неколку лица кои биле одговорни за работењето на објектот.
Сепак, новата трагедија повторно ги стави под лупа процедурите за складирање на муниција и прашањето дали се преземаат доволно мерки за заштита на цивилното население.
Во Киевската област е прогласен ден на жалост, додека спасувачките екипи продолжуваат со работа на теренот и со пребарување на погоденото подрачје.
