Неверојатен медицински случај е забележан во Шри Ланка, каде лекари од мочниот меур на 55-годишен маж отстраниле огромен камен тежок дури 3,1 килограми.
Операцијата била извршена во Општата болница во Тринкомали, а каменот бил долг околу 17 сантиметри и по големина се споредува со јајце од ној.
Пациентот првично бил примен во болница поради мозочен удар. За време на лекувањето, лекарите забележале дека има сериозни тешкотии со мокрењето, по што дополнителните испитувања го откриле огромниот камен.
Медицинскиот тим смета дека станува збор за најголемиот досега документиран камен во мочниот меур отстранет по хируршки пат.
Лекарот кој го предводел тимот, д-р Прахалахан Балакришнан, изјавил дека пациентот по операцијата е во многу добра здравствена состојба. Според неговата проценка, каменот најверојатно се создавал во организмот меѓу пет и десет години.
Камењата во мочниот меур се создаваат кога минералите во урината кристализираат и формираат цврсти наслаги. Поголемите камења можат да го попречат мокрењето и најчесто бараат медицинска интервенција.
Досегашниот рекорд, според Гинисовата книга на рекорди, бил забележан во Бразил во 2003 година, кога бил отстранет камен тежок 1,9 килограми. Новиот случај од Шри Ланка е значително потежок – дури 3,1 килограми.
