Глобалното зголемување на потрошувачката на електрична енергија во центрите за податоци кои ги користат технологиите за вештачка интелигенција, заедно со нестабилните извори на обновлива енергија, ќе предизвика сериозни проблеми и „двојна нестабилност“ во функционирањето на енергетските системи.
Експерти предупредуваат дека владите мора да воведат ограничувања на растот на потрошувачката на струја од страна на големите технолошки компании, за да се обезбеди стабилно и сигурно снабдување со енергија, вели Андрес Ширенбек, извршен директор на „Хитачи Енерџи“, најголемиот светски производител на трансформатори.
Според него, индустријата за вештачка интелигенција користи енергија на начин што е непознат и неприфатлив во други сектори. Центрите за податоци што работат со ВИ алгоритми можат да го зголемат својот енергетски капацитет и до 10 пати за само неколку секунди по стартувањето на обработка на податоци, што создава огромен и наголем притисок врз мрежата. Ова е поинаку од традиционалните канцелариски центри за податоци кои имаат стабилна и предвидлива потрошувачка.
Ширенбек објаснува дека таквиот модел на потрошувачка е неприфатлив и дека компаниите што работат со такви интензивни алгоритми би требало да се регулираат и да добиваат дозвола од енергетските оператори, како што е случај со индустрии како што се топилниците.
Меѓународната агенција за енергија предвидува дека потрошувачката на струја од страна на центрите за податоци ќе се удвои до 2030 година, достигнувајќи 945 терават-часови, што е повеќе од моменталната потрошувачка на цела држава како Јапонија. Како резултат, некои земји како Ирска и Холандија веќе почнаа да го ограничуваат развојот на нови центри за податоци, поради загриженост за нивното влијание врз стабилноста на електроенергетските мрежи.
Оваа состојба укажува на итна потреба за нови регулативи и политика кои ќе го контролираат и управуваат растот на потрошувачката на електрична енергија од страна на ВИ центрите, со цел да се избегне сериозна криза во снабдувањето со енергија на глобално ниво.
