Шест мистериозни метални сфери кои викендов беа пронајдени на плажата Форест Бич во северниот дел на австралиската држава Квинсленд предизвикаа големо внимание, а првичните анализи покажуваат дека најверојатно станува збор за делови од вселенска ракета.
Според Австралиската вселенска агенција, предметите најверојатно се резервоари под притисок кои биле дел од вселенско лансирно летало. Нивната форма, големина и местото каде што биле пронајдени се совпаѓаат со карактеристиките на остатоци од странска ракета која неодамна повторно навлегла во атмосферата по престој во орбитата.
Во моментов се спроведува меѓународна истрага за да се утврди од кое лансирно летало потекнуваат металните сфери и како завршиле на австралискиот брег.
Поради можниот ризик, противпожарната служба на Квинсленд воспоставила безбедносен периметар од 50 метри околу местото каде што биле откриени предметите. Надлежните апелираат граѓаните да не ги допираат доколку забележат слични објекти, туку веднаш да ги известат службите за итни случаи.
Во јавноста се појавија и шпекулации дека сферите би можеле да бидат резервоари за ракетно гориво, во кои можеби има остатоци од запаливи или реактивни материи. Поради тоа, специјализирани тимови со заштитна опрема ги презеле предметите и ги сместиле во специјални контејнери за опасен отпад, под полициски надзор.
Необичниот настан привлече големо внимание и кај жителите на малото крајбрежно место Форест Бич, каде вакви случаи речиси никогаш не се случуваат.
Инаку, ова не е првпат вселенски отпад да биде пронајден во Австралија. Во 2023 година индиските власти потврдија дека голема метална купола откриена на плажа во Западна Австралија била дел од ракета за лансирање сателити, додека сличен сферичен објект беше пронајден и во Намибија во 2011 година, за кој експертите тогаш оценија дека најверојатно потекнува од ракетен систем.
