Бразилската полиција уапсила 33-годишен маж, осомничен дека е поврзан со најмалку 16 убиства. Тој бил пронајден по 30-часовна потрага на безбедносните сили во шумска област во сојузната држава Параиба, на североистокот од Бразил.
Според локалната полиција, мажот е осомничен дека од мај годинава извршил најмалку 16 убиства. За време на сослушувањето, тој признал дека стои зад 11 од нив.
Особено внимание предизвикал начинот на кој се обидел да ѝ избега на полицијата. Во моментот на апсењето бил облечен во женска облека и носел долга црна перика, со цел да го прикрие својот идентитет додека се криел во шумата.
За време на испитувањето, осомничениот дал уште пошокантно тврдење. Тој на истражителите им рекол дека учествувал во дури 80 убиства. Оваа бројка засега не е потврдена од властите и истрагата треба да утврди дали неговите тврдења имаат реална основа.
Бразилските власти досега не соопштиле детали за идентитетот на жртвите, ниту пак за начинот на кој биле извршени наводните убиства.
Неколку недели пред апсењето, осомничениот успеал да побегне по конфликт со безбедносните сили. Полицијата го поврзува со криминална група која ја опишува како исклучително насилна и која дејствува во регионот.
Самиот 33-годишник, сепак, ги отфрлил ваквите наводи и тврдел дека делувал сам, без поврзаност со криминалните фракции што се активни во тој дел од Бразил.
Во текот на сослушувањето тој тврдел и дека сите негови наводни жртви биле поврзани со криминалното подземје. Како мотив навел дека решил сам да ја земе правдата во свои раце, откако неговото семејство наводно добило закани.
Истрагата продолжува, а надлежните органи треба да ги проверат неговите признанија и тврдењата за бројот на жртвите, како и евентуалната поврзаност со организирани криминални групи.
