Венецуелскиот претседател Николас Мадуро прогласи вонредна состојба во земјата откако утринава беа регистрирани повеќе силни експлозии во главниот град Каракас и во уште неколку региони.
Од кабинетот на Мадуро соопштија дека напади биле пријавени не само во престолнината, туку и во регионите Миранда, Арагуа и Гуара. Венецуелските власти директно ги обвинија Соединетите Американски Држави за настаните, оценувајќи дека станува збор за „отворена агресија“.
„Целта на американските напади е јасна – да се стекнат со контрола врз нашата нафта и природни ресурси. Венецуела решително ја отфрла оваа агресија и нема да дозволи одземање на своето национално богатство“, се наведува во официјалното соопштение.
Владата упати повик до сите политички, општествени и институционални структури во земјата да се мобилизираат и да застанат зад државата во, како што е наведено, „критичен момент за националниот суверенитет“.
Според првичните информации, најмалку седум експлозии одекнале околу 2:00 часот по локално време. Жителите на Каракас сведочат дека биле забележани авиони и хеликоптери кои летале на мала височина над градот, по што меѓу населението настанала паника и луѓето масовно излегле на улиците.
Јужните делови на престолнината, вклучувајќи и подрачје во близина на голема воена база, останале без електрична енергија. Телевизијата NTN24 објави фотографии на кои се гледа густ чад над градот, кој бил видлив и во близина на аеродромот Карлота. На видеоснимки емитувани од VPItv се забележуваат повеќе хеликоптери кои кружат над Каракас во текот на ноќта.
Овие настани доаѓаат по серијата акции на американската морнарица, која во изминатите денови нападна неколку венецуелски бродови за кои Вашингтон тврди дека биле вклучени во трговија со дрога. Американскиот претседател Доналд Трамп претходно најави можност за проширување на операциите и врз копнени цели во Венецуела, а неодамна потврди дека американските сили нападнале и пристаниште кое, според САД, било користено за нелегален транспорт на наркотици.
Иако Венецуела пред неколку дена изрази подготвеност за разговори со САД во врска со борбата против трговијата со дрога, Мадуро во претходно снимено интервју оцени дека Вашингтон всушност води долгорочна кампања за притисок со цел промена на власта и обезбедување пристап до огромните нафтени резерви на земјата.
Ситуацијата во Венецуела останува напната, а властите најавуваат дополнителни мерки за безбедност и заштита на државните институции и населението.
