Мистериозна вооружена група позната како „Црните Руси“ презеде одговорност за упад на територијата на Латвија, членка на НАТО, при што маскирани лица наводно им се заканувале на латвиски војници и оштетиле опрема за граничен надзор.
Инцидентот се случил ноќта кон 6 октомври, на границата меѓу Латвија и Белорусија.
Според објавените информации, вооружените мажи придружувале група мигранти кои се обидувале да ја преминат границата, по што оштетиле електричен ормар и украле надзорни камери.
По инцидентот, осомничените се вратиле на белоруска територија.
Неколку дена подоцна, групата објавила видеопорака на Телеграм, во која маскиран маж со изменет глас се заканил со нови акции.
„Ова беше само тест, а Латвија не го помина. Наскоро ќе видите нешто слично и на други делови од нашата граница“, порачал претставникот на групата.
Тој ги нарекол НАТО и Европската Унија „колос на глинени нозе“, тврдејќи дека ќе се распаднат по првиот удар.
Латвиските безбедносни експерти се сомневаат дека зад групата би можеле да стојат руските или белоруските разузнавачки служби, кои на ваков начин би спроведувале диверзантски операции без директно да преземат одговорност.
Сепак, засега нема јавно презентирани докази што би потврдиле дека „Црните Руси“ дејствуваат по наредба на Москва или Минск.
Латвиската служба за државна безбедност започнала кривична истрага поврзана со формирање криминална организација, додека надлежните предупредуваат на можни нови провокации на границата.
Белорускиот претседател Александар Лукашенко ја отфрли вмешаноста на неговата земја, тврдејќи дека станува збор за провокација организирана од Латвија.
Инцидентот дополнително ги зголеми безбедносните тензии на источната граница на НАТО, каде што во последните години се регистрирани бројни обиди за нелегално преминување и оштетување на граничната инфраструктура.
