Киев се соочува со една од најтешките зими од почетокот на војната, откако масовни напади ја погодија енергетската инфраструктура. Повеќе од 1.000 станбени згради останаа без греење, а илјадници граѓани минуваат денови во студ и неизвесност.
Украинските власти потврдуваат дека штетите се сериозни и дека обновата оди тешко, додека претседателот Володимир Зеленски отворено призна дека ситуацијата е „екстремно тешка“, особено во регионите блиску до линијата на судир.
Според него, нападите не се случајни и се изведени токму во период на екстремни температури, со цел дополнително да се зголеми притисокот врз цивилното население. На терен се ангажирани стотици екипи кои се обидуваат да ги санираат дефектите и постепено да ја вратат струјата, водата и греењето.
Во изминатите денови се регистрирани десетици удари врз енергетски објекти, а прекините во снабдувањето продолжуваат да ја влошуваат секојдневната состојба на граѓаните. Властите предупредуваат дека следните денови ќе бидат клучни и апелираат на трпение додека траат интервенциите.
