Администрацијата во Вашингтон испраќа збунувачки и контрадикторни сигнали околу иднината на Гренланд, стратешки важната арктичка територија под данска управа. Додека од Белата куќа јавно не се исклучува можноста за употреба на воена сила, во исто време се подготвува дипломатска и финансиска понуда за купување на островот.
Портпаролката на Белата куќа изјави дека претседателот Доналд Трамп и неговиот тим разгледуваат „широк спектар на опции“ за остварување на оваа надворешнополитичка цел, при што нагласи дека американската војска секогаш е на располагање на врховниот командант. Изјавата предизвика бурни реакции, особено во Европа.
Во сосема поинаков тон, државниот секретар Марко Рубио, на затворени разговори со конгресмени, порачал дека агресивната реторика не треба да се толкува како подготовка за воена интервенција. Според информации објавени во влијателни американски медиуми, главниот фокус на администрацијата останува обидот за купување на Гренланд, а не негово насилно преземање.
Трамп, наводно, веќе побарал нов, ажуриран план за преземање на островот, идеја што ја промовира уште од првиот мандат, правдајќи ја со националната безбедност и геостратешката важност на Арктикот.
Во меѓувреме, седум европски држави јавно застанаа во одбрана на Гренланд и Данска, нагласувајќи дека суверенитетот на територијата е недопирлив. Европските лидери предупредија дека каков било притисок или закана врз членка на НАТО би имал сериозни последици по стабилноста на западната безбедносна алијанса.
