Данска подготвува значајни промени во образовниот систем, со кои наставниците ќе добијат поголеми овластувања за физичка интервенција во ситуации кога учениците ја загрозуваат безбедноста или сериозно ја попречуваат наставата.
Данската влада на 8 октомври доставила предлог-закон до парламентот, со кој се предвидува наставниците да можат да реагираат кога ученик се однесува насилно, претставува опасност за себе или за другите, уништува училишен инвентар или го попречува учењето на останатите.
Според предложените правила, наставниците во одредени ситуации ќе можат физички да задржат ученик или да го отстранат од училницата.
Сепак, ваквите мерки ќе бидат дозволени само доколку проблемот не може да се реши со разговор или со други, поблаги постапки.
Од данската влада нагласуваат дека не станува збор за враќање на физичкото казнување на децата, кое во земјата е забрането уште од 1967 година.
Удирањето и другите облици на телесно казнување и понатаму ќе останат строго забранети.
Физичката интервенција ќе мора да биде пропорционална, да трае што е можно пократко и да се применува исклучиво како последна мерка.
Предвидено е и задолжително евидентирање на ваквите интервенции, како и информирање на родителите.
Предлогот предизвика дебата во Данска. Поддржувачите сметаат дека наставниците мора да имаат инструменти за одржување на редот, додека критичарите предупредуваат на можни злоупотреби и нарушување на детските права.
Предлог-законот сè уште не е усвоен, а првото парламентарно разгледување е закажано за 10 ноември 2026 година.
