Во фабриката на унгарската нафтена компанија МОЛ денеска дојде до експлозија во која повеќе лица се тешко повредени, а едно лице го загуби животот, се наведува во соопштението на компанијата.
„Дојде до експлозија за време на повторното пуштање во погон на постројката 'Олефин 1' на локацијата на МОЛ Петрохемија во Тисаујварош. Пожарот е локализиран, а интервенцијата во моментов е во тек. Инцидентот резултираше со неколку тешко повредени лица и еден смртен исход. Експертите ги истражуваат околностите на несреќата“, соопштија од компанијата за порталот 444.
Унгарскиот премиер Петер Маѓар извести дека министерот за енергетика Иштван Капитани набрзо ќе пристигне на лице место заедно со извршниот директор на МОЛ, Жолт Хернади.
Градоначалникот на Тисаујварош, Ѓерѓ Филеп, изјави дека не се потребни мерки за јавна заштита и вети дека ќе продолжи да ја информира јавноста за развојот на настаните, додека Дирекцијата за управување со катастрофи на жупанијата Боршод-Абауј-Земплен соопшти дека околното население не е во опасност, пренесува Nemzet.
Портпаролот на Националната служба за итна помош, Пал Ѓерфи, за МТИ изјави дека возилата на брзата помош излегле на терен по протокол за масовна несреќа, при што на локацијата пристигнале три спасувачки хеликоптери и бројни спасувачки единици.
Што произведува овој погон?
МОЛ Петрохемија е хемиски центар на групацијата кој произведува етилен и пропилен користејќи нафта и дизел гориво, кои потоа ги преработува во полиетилен со ниска, средна и висока густина, како и во полипропилен.
Полиетиленот е најчестиот вид пластика, додека полипропиленот има широк спектар на примена и се користи во технологијата за пакување, текстилната индустрија, производството на канцелариски материјал, како и за лабораториска и автомобилска опрема.
