Најмалку 31 лице загина, а 169 се ранети во самоубиствен бомбашки напад во шиитска џамија во пакистанскиот главен град Исламабад утрово, потврди владин претставник.
Експлозијата се случила за време на утринската молитва во џамијата „Хадиџа Тул Кубра“. Според првичните информации од безбедносните служби, напаѓачот бил запрен на влезот во комплексот, но активирал експлозивна направа, предизвикувајќи масакр.
На местото на нападот веднаш биле испратени бројни служби за итни случаи, а областа била опколена со полициско и воено присуство. Стотици луѓе се собрале во близина на џамијата, додека вооружени војници спречувале приближување на љубопитни минувачи.
Главната министерка на пакистанската провинција Пенџаб, Меријам Наваз Шариф, изјави дека на терен биле испратени 25 целосно опремени амбулантни возила, а сите болници во округот Равалпинди се ставени во состојба на висока готовност. „Хируршки тимови, анестезиолози, ортопедски и неврохируршки специјалисти се подготвени за итни случаи“, додаде Шариф.
Нападот беше осуден од високите владини претставници. Пакистанскиот министер за надворешни работи и заменик-премиер Ишак Дар го нарече инцидентот „кукавички самоубиствен напад врз невини верници“. „Нападите врз местата за богослужба и цивилите се гнасен злостор против човештвото и очигледно кршење на исламските принципи. Пакистан останува обединет во борбата против тероризмот“, рече Дар.
Претседателот на Пакистан, исто така, го осуди нападот, нарекувајќи го „злосторство против човештвото“.
Истрагата за нападот е во тек, а ниту една група сè уште не ја презела одговорноста. Безбедносните мерки во Исламабад и околните области се дополнително заострени.
