Британската актерска сцена остана без една од своите најголеми легенди. На 86-годишна возраст почина Пенелопе Кит, прославената актерка која со децении беше едно од најпрепознатливите лица на британската телевизија, театар и филм.
Според информациите што ги објави нејзиното семејство, Кит починала во својот дом во Сари, по битка со ракот. Веста предизвика бројни реакции од колеги, пријатели и љубители на нејзината работа ширум светот.
Пенелопе Кит ја започнала својата кариера на театарската сцена, а уште во 1963 година станала дел од престижната Кралска шекспирова компанија. Најголемата слава ја стекнала со улогата на Марго Лидбетер во култната британска серија „The Good Life“, за која во 1977 година ја освоила и престижната награда БАФТА.
Покрај оваа улога, таа остави силен белег и во серијата „To the Manor Born“, а нејзиниот препознатлив глас беше дел и од детската емисија „Телетабиси“, како и од бројни документарни проекти и реклами.
Нејзината долгогодишна колешка Фелисити Кендал ја опиша како „комичен гениј“ и истакна дека работата со неа била вистинска привилегија.
И во подоцнежните години Пенелопе Кит остана активна на сцената, а во 2014 година ѝ беше доделена титулата Дама за исклучителниот придонес во уметноста и хуманитарната дејност. Во знак на почит кон нејзиниот живот и кариера, театрите во лондонскиот Вест Енд ќе ги изгаснат светлата во нејзина чест.
Зад себе ја остави богата актерска кариера и сопругот Родни Тимпсон, со кого беше во долгогодишен брак.
