Белгиските власти разбија терористичка ќелија која наводно планирала напад врз премиерот Барт де Вевер со беспилотно летало. Истражителите откриле рачно изработени експлозиви што осомничените планирале да ги прикачат на дронот за извршување на нападот.
Три лица, родени во 2001, 2002 и 2007 година и сите од Антверпен, се лишени од слобода. Отворена е истрага за обид за терористичко убиство и учество во активности на терористичка група, без да се прецизира за која група станува збор.
При претресот, властите заплениле и 3D печатач и електронски компоненти, кои осомничените ги користеле за изработка на експлозиви и дронови.
Обвинителството потенцира дека овој случај ја нагласува потребата од постојана будност на полицијата и разузнавачките служби поради ризикот од терористички напади.
Барт де Вевер, фламански националист, положи заклетва како премиер на Белгија во февруари 2025 година, станувајќи првиот националист од Фландрија кој ја предводи земјата по долги преговори за формирање коалиција.
