Градоначалникот на Њујорк, Зохран Мамдани, упати остри критики кон американската воена операција во Венецуела, во која беа уапсени венецуелскиот претседател Николас Мадуро и неговата сопруга Силија Флорес. Според Мамдани, станува збор за едностран чин што претставува кршење на американскиот Устав и меѓународното право.
Во објава на социјалната мрежа X, градоначалникот наведе дека бил официјално информиран за апсењето и за плановите Мадуро да биде префрлен во федерален затвор во Њујорк. Тој оцени дека ваквиот потег претставува опасен преседан и директен притисок за промена на режимот во суверена држава.
Мамдани предупреди дека последиците од операцијата не се ограничени само на меѓународната сцена, туку имаат директно влијание и врз Њујорк, каде живеат десетици илјади граѓани со венецуелско потекло. Според него, безбедноста на тие заедници е приоритет за градските власти.
„Оваа ситуација создава дополнителна нестабилност и страв кај луѓето кои Њујорк го сметаат за свој дом. Градската администрација внимателно ја следи состојбата и ќе издава навремени информации и насоки“, порача Мамдани.
Од другата страна, американскиот претседател Доналд Трамп изјави дека Соединетите Држави привремено ќе ја „водат Венецуела“ сè додека не се воспостави, како што рече, безбедна и уредна политичка транзиција. Тој најави и влез на американски нафтени компании во земјата.
Главниот обвинител на САД, Пам Бонди, потврди дека против Мадуро и Флорес се поднесени обвиненија пред федерален суд во Њујорк, каде што ќе им се суди по нивното пристигнување во Соединетите Држави.
