Доналд Трамп со нов жесток напад врз енергетската стратегија на Европа, овојпат директно целејќи кон Обединетото Кралство. Преку својата платформа „Truth Social“, тој упати остри критики до Лондон, тврдејќи дека британското одбивање да ја искористи нафтата од Северното Море е рамно на економско самоубиство кое ја остава цела Европа во енергетски мрак. Трамп не штедеше зборови, порачувајќи им на Британците дека треба веднаш да почнат со масовно бушење наместо да се потпираат на „ветерници“.
Според неговата анализа, додека Велика Британија ги игнорира сопствените ресурси, Норвешка профитира ненормално многу продавајќи ја својата нафта по вртоглави цени на истата таа Европа која е во очајна потрага по енергенси. Трамп посочи дека градот Абердин, некогашниот центар на нафтената индустрија, би можел да доживее неверојатен економски процвет доколку се промени политиката, наместо да се форсираат обновливите извори кои, според него, не се решение за моменталната криза.
Оваа реторика доаѓа во критичен момент кога глобалните енергетски пазари се пред колапс поради хаосот на Блискиот Исток и американската блокада на Иран. Цената на „црното злато“ дивее бидејќи снабдувањето преку Ормутскиот теснец е под постојана закана, а европските земји се во паника откако ги прекинаа врските со руските енергенси. Додека Трамп инсистира на фосилните горива како единствен спас, европските лидери се наоѓаат помеѓу чеканот и наковалната – да се вратат на нафтата за да преживеат или да продолжат со зелената агенда додека цените на сметките го „горат“ џебот на граѓаните. Светот сега со страв ги следи берзите, додека енергетската војна станува пожестока од онаа на терен.
